BieAlphonsus1673p016

Mopsus Jae sulcx gheloof ick wel, dat was een Coningin
Maer die is nu ghetrouwt, des' moet het stopgat wesen
Nu d'eerste is misluckt, ghelijck het was voor desen,
En moet ghenesen al sijn lijden en sijn smert,
Nimus. Mopsus; daer lieght ghy aen in't midden door u hert
Sy is soo goet als hy, men moet met ons niet gecken
Felicia. Seer Edel Heer t'wordt tijdt dat ick my sou vertrecken,
Want geen ghy soeckt is niet ten opsicht van mijn trouw
Spreckt iemand' anders aen. Alph. Des' antwoord' ach! die sou
My locken tot het graf, hebt ghy dan quaet vermoeden?
Felicia. DIe haestich is om gaen behoort hem ras te spoeden,
Alpho. Ach soetste! noyt en sucht ick als om uwe schoont
Felicia. Soo wordt ghy daeghelijckx met groot verdriet gheloont:
Alpho. Ick bid u wilt den bandt van mijnen lust dan breken:
Felicia. Swijght Graef want g'hebt in't hert maer enckel valsheyt steken,
Alpho. Dat ick verwinnen cost mijn weenen waer ghedaen
Felicia. Die haest verwonnen is die isser qualijck aen,
Alpho. Ach soetsten dagheraet de min my neer doet buyghen
Felicia. Den mondt die seydt al veel t'geen' t'hert niet sal ghetuyghen
Alpho. Meynt ghy dan waerde Maeght dat ick in listen swem?
Felicia. Een Maeght die licht ghelooft die is licht inde klem:
Alpho. Ontfanght mijn weder-comst, die u soo seer naer steygert,
Felicia. T'is een seer trotse Maeght, die d'Eelmans consten weygert.
Alpho. Me-Ioff-vrou, oft ick cost met offer van ghetraen
U dienen naer den heysch, ick sou dat haest bestaen,
Soo weenen helpen mocht wat sou ick traenen gieten
Om eens u weder-jonst van liefde te ghenieten,
Geen mensch ghetuyghen can dat ick uyt mijnen mondt
Liet glijen eenich woordt daer jemand' list in vondt,
Mijn liefde heeft altijd met trouwicheyt begonnen
Felicia. Die stets trouw-hertich blijft, die heeft sijn lief ghewonnen.
Alpho. In alles my ghebiedt, ick sal u metter daet
Bethoonen tot een proef dat my ter herten gaet,