Alphonsus en Thebasile

Boer Ariaen. Daer hebb'ick met mijn wijf een campken uytghestaen en soo lustich gheslaen dat sy't lanck sal onthouwen, niemant ter wereld en en isser argher aen, als die met boose vrouwen soo averrechts sijn ghequelt, ghelijck ick ben ghestelt dat my lanck sal berouwen, hoe seer dat ick nochtans heb buyten leeren touwe, noch is sy my te gouw in 't heel Europse Rijck en is geen quader Hoer, besonder inde wijck van Grimma daer ich woon, k' en sou in geen chronijck haer felheydt connen schrijven, om al het ongelijck n en swaren overlast, die my noch sal ontlijven, moet ick noch langher blijven met soo een beest ghepaert, hoe wel een hoeren kint is altijdt boos van aert, en nievers voor vervaert om ieghelijck t'onteeren. Wijf. Men moet soo al den dagh de horendragers leere, die nievers en verkeere als in het schoonst en best ... gaet aen ghy luyse-nest en heymelijcken bijter, bordeelsen coppelaer, ghy siel en wijve smijter, potschijter, hipocriet. Man. Voorwaer en liet ick-t niet om allen ons ghebueren, ich smeet haer sessens doot dan waer ick uyt t'verdriet, Wijf. Sa schelm wilt my eens rueren, ick ben soo goet als ghy. Man. Ghy sult my dit betaelen soo ick eens maeck alerm. Wijf. dat vercken moet weer eens van mijn vuysten proeven, compt aen ghy boef der boeven, dan sal u oversnoeven terstont eens fijn ghedaen, Man. ist moghelijck, Wijf. Jae sloef der sloeven en vuylen roffiaen, die qualijck stil can staen door al die spaense mieren die om sijn billen swieren, wat dunckt u van die daey, de kausens hanghen hem op de schoenen en 't hem op de broeck. Man. Daar lieghde aen, ten is maer eenen quaden kints doeck, ick en heb gheen hemde aen ghy schelmse clappey. Wijf. Wat dunckt u van die pastey, en sou hij geen galey of rat ocnnen stofferen, daer sagh ick hem al te geren, viel eens mijn wenschen waer. Man. Het is een toeverraers oft een hels duyvels haer die ick eens met die stael den beck sal leeren snoeren. WIjf. Begint ghy satte beest en wilt my maereens roeren k'sal u soo toereloeren dat ghy't ghedencken sult. Man. Ick sien sy is van daegh weer qualijck op ghehult, en met

fenijn ghevult om op mijn lijf te spouwen, men vint gheen argher spoock als tonghen van quaey vrouwen, die sigh gherust can houwen en blijven inden nost is den geluckichsten, de vrijheyt is de best. Wijf. Hier sal noch op het lest een wijs sermoon naer volghen ghelijck Pilatus die de passi preken wou. Man. En maeckt my niet verbolghen oft gram, want ick licht sou tot u groot leet en rouw mijn personagi spelen dat ghy het sout bequelen dus siet wat datghe doet. Wijf. Maer arm en slechten bloet die weert is uyt-ghegeckt. Man. Sult ghy dan mijn respeckt soo teghen reden verliesen Wijf. Dat men sulcken respect eens liet bevriesen, het waer seer deerlijck voor gheestelijck en weerlijck want t'is een respect van vlot biesen, daer niet in en steckt als vuylicheyt dat is ghecomponeert van ledicheyt en luyicheyt. Man. Ghy lepelstraetse soegh en schelmse vuyl pottagi, ick meynde dat ick had de crawasi en 'tlijn de spaense mieren die my bijten. Wijf. Men sou hem van dien clap beschijten, dat hy nuchteren waer hy en sprack niet een woort. Man. Men moest sulcken verckens setten op de poort, meynt ghy my soo te bedodden, seght ghy hoeren vodde daer eer noch schaemte in en steckt. Wijf. Ick en weet niet wat den sot gebreckt dien weer-wolf, dien vrouwen-eter, die luys-pock, hipocriet en eer-vergeter, dien calvenist en sodomiet, al liegh ick de helft ten schaeyt niet. Man. Hout u tonghe ghy vuyl dante ghy en ghelooft gheen sante voor dat hy mirakel en doet, hout dat en dat ick sal u leere my sulckx verwijten. Wijf. Ick en geef daer niet om al sout ghy mt den neus af bijten ick sal u beschijten waer dat ick can. Sa sa slaet toe syt ghy een man. Man. Hout dat en dat dan, en vreest ghy gheene slaeghen. Wijf. Wel wie sou dat verdraghen van soo een hoere-kint och wat een plaeghen my waeyen over't hooft, dat hy op't reck-stroo lagh k'en sagh noot schoonder doodt, ick gaen en wil met recht van desen rekel scheyden. Man. Gaet mottigh slanghe vel, wilt daer niet langh med' beyden de droes moet u gheleyden, dan ben ick uyt't verdriet. Wijf. En ick ontslaghen van eenen grooten deugeniet, ick wil ontbonden wesen. Man. Gaet aen ghy vinnigh stael, en giftigh slanghen vel. Wijf. Ick sal't den officiael genoegh te kennen gheven, noch liever in het graf als langer

soo te leven.. Binnen. Man. Gaet aen ghy raven aes en assestel vander Hellen daer ick u dickwils wensch om my niet meer te quellen sy is het lammeken dat rust in 't duyvels schoot, haer boosheyt is te groot om langher me te leven, cost ick haer sonder sond' met rattecruyt vergheven, 'ken sou soo seer niet beven voor hare rasernij, dan waer ick wederom ghelijck te voren vry. Hans Tromp uyt. Hans. Die de fortuyn betrouwt die siet men seer licht dwaelen en veel rampspoet haelen ghelijck ick hier beken, want schoon dat ick nu ben vermaert in veele rijcken, nochtans heb moeten wijcken uyt steden en uyt kercken, want al dat brant-mercken en stont my gans niet aen, ick hebber twee op den rugh staen, en t'derde ben ontslopen, ick benuyt t'cot ghecropen daer ick son noch maen en sach, jae heb gheloopen nacht en dach om de doot te ontspringen, want van het derde en moght ick gheen lieken singhen, soo gaen ick voor alle dinghen eens op het platte lant en stelle mijn verstant van alle cant te werck, het sy op straet, in huys oft inde volle kerck, al sou ick met schant hier oock worden verdreven, om soo te vervullen de leghende van mijn leven, sy en is niet volschreven voor ick en ben opghecnoopt, de doot en bijt niet als men die ontloopt, Ick heb soo menich mensch sijn bors ghestroopt met behendighlijck te lieghen en jeghelijck met list en valsheyt te bedrieghen, daer by ben ick seer gheestich van aert en in de const van borssesnijen soo vermaert, dat niemand my the boven gaet om een proy te vanghen, ick weet de huyck naer den wint te hanghen, en duysent valsche pranghen te setten tot iemants leet, redenen dat ick oock den subtijlen borsse-snijer heet, hoe wel dat ick noch dickwils ben gheweest aen de koorde en anders niet en hoorde als hanght hem op hanght hem op, maer noch noot gheweest in den strop, om dat ick my weet te houwen voor een man der mannen, al ben ick uyt Vranckrijck ghebannen soo sal ick hier eens mijnen naem verheffen en aerdich overtreffen al die ervaren sijn en in de konst vol-leert, want daermen med'verkeert daer wortmen med'gheeert. Het ghebodt ghy en sult niet stelen, dat en treck ick my niet aen, want wetende dat ick in de geusen predestinati

staen soo ben ick een exceptie vanden gheneralen reghel die ick al den dagh met nieuw practijck beseghel. Te Parijs, Lions en te Peroese daer heb ick langh verkeert en om mijn gauwicheyt van ieder een wert gheeert. Maer te Orleans sat ick eens in de boyen, om dat ick uyt de wey twee vette koyen des snachts ghestolen had, maer daer was een jonck proper meysken dat my van de galgh bad, doch ick swil van spijt ghelijck een pad dat ick haer ben ontloopen en ontgaen want korts daer naer moest ick binnen roaen aen een kaeck staen om dat ick ee nkindt fijn gouden cruys had afghesneden waerom ick oock tegen reden cregh een brandt-merck op den rugh toch ick sal hier beter toesien als ick tot Marcelien deed'al waer ick eens een Bors sneed' en daer en stack maer in negen stuyvers een oort min in cley gelt, een Franse -croon met eenen ouden Flip waerom ick creegh een wip het geen my langh sal spijten, datmen moet een coor verslijten om soo cleynen feyt, eyndelijck in Vranckrijck en is voor my niet als swarigheyt, dus nam ick mijn afscheyt en wil dees landen eens beproeven, en sien ofter de boeven oock al dick sijn ghesaeyt die mijn taal verstaen daer het al op draeyt, sie wie hier comt aenghetreden. Neel uyt. Neel. Niemant is mijns ghelijck in valse behendicheden ick ben alleen met reden de faem van alle dievery van Voet branden moorden en ander schelmery van duysent practijcken op een ry, niemant my te gelijcken in alle apery in 't heele Neder-landt, ick heb alle sorten van stelen op mijn handt om iemandt sijn bors te snijen, oft in de kerck eenen sleutel-riem te vrijen, en valse bootschappen te doen dat is mijn nieuwste fatsoen, om cnoppen van mantels te draeyen, om huycken aen een te naeyen, waer door ick brengh een groot crakeel, als wanneer ick aerdigh mijn personagi speel, voorts van savondts in huysen te sluypen en in kelder-gaten te kruypen en noch veel ander listen die niemandt oyt en wisten weet ick te pleghen met fatsoen, want t'is heden-daeghs met borssesnijen al te doen, waer in ick wel ervaeren ben. Hans. Ick ben al onderricht my dunckt dat ick u ken, ghy sijt gemeestereert inde behendigheyt, ick heb op uwe kennis langh ghenoegh tegheleydt, dus laet ons saemen gaen een vest oft twee om wandelen

en breeder vande const der strooperijen handelen, om malcanderen wel te verstaen want al de valsheydt van ons stelen hanght daer aen. Neel. Van waer is uwe comst. Hans. Ick com soo van roaen. Neel. Soo wil ick u ondervraegen oft ghy wel Vossen cont uyt hunne hollen jaeghen, hebt ghy den smit op uwe handt en kunt ghy 't alle kant de spit oock seker draeyen om somtijts een stuck vlees oft schouwer aen te braeyen. Hans. Ick bid u hoort my aen ick sal u haestigh paeyen de voskens soo ghy my daer hebt terstont vertelt dat is't ghemunte ghelt, haer hollen is de bors daer sy sijn inghestelt, voorts dient oock gheweten dat ick't behanghsel segh in plaets van eene keten en met bollen te spelen sijn cnoppen te draeyen en mantels te stelen, het breeckeyser den smit ick noem, waerop wy onsen roem met reden moghen draghen om dat wy ider een daer med'soo dickwils plaeghen, de spit sijn dysers van een keldergat, stucke vlees sijn onse medematen in de stadt, de leer noeme ick een schael, het huys een hooghe sael en het mes dat is het stael, voorts soo weet ick seer vremt te fluyten, waerin ick tot ghemack heel reden can besluyten, het schavot is het tafereel, de vierschaer het staele bekeneel, den cipier den smit van het ghebeent, het vonnis den poignaert steeck dat ons de doot verleent, de justitie die ons doet vallen, die noem ick gheschut ballen en de houte galghe finibus terre ons leste gherecht. Nee. 'Tis soo ghelijck ghy seght ick heb hier just het peert in't oogh gheraeckt, want ghy sijt oock inde const soo vry als ick volmaeckt, laet ons den aenslagh maecken en ievers sien te raecken aer eene bors met gelt, want teghenwoordigh is in mijn niet veel ghestelt. Binnen. Ariaen uyt. Jae dat men sich bescheet van lachen ten waer geen wonder, omdat mijn wijf weer maeckt sulcken ghetier, gheraes en stijf ghedonder dat mijne blaes schier is ghescheurt, t'is een recht duyvels aes ten salder nimmer stil sijn, sy wilt de broeck draeghen en meester wesen dat ick wil sijn, het is een puer sottin het schijnt sy heeft een tongh van loot en buscruyt in vervloeckt moer sijn de min die my soo quam verleyen. Neel uyt. Wat let u baes, den Heer wil u geleyden wat ist dat u verstoort. Ariaen.