BieAlphonsus1673p012

Noch sal eer corten tijdt verandren uwen sin
Die u van desen lust gheheelijck sal berooven
Alpho. Dit can ick nimmermeer, dat sweir ick u, ghelooven
Want liefde is oprecht die nu mijn hert besit,
Ick liet my snijden eer gheel van lit tot lit
Als ick verlaeten sou die ick heb in mijn sinnen,
Taurin Eer cort sal u de doodt van eenen Vorst verwinnen
En brenghen in veel pijn, in anxt en swaer verdriet
Jae die ghy nu bemint, sult ghy dan minnen niet
Maer haeten als de pest, jae vluchten als de donder
En t'sal alsoo gheschien al ghevet u nu wonder,
Nochtans sal evenwel u Echte Vrou noch sijn
De schoon Felicia, niet sonder groote pijn
En over groot verdriet, dat haer oock sal geschieden
Al ist dat ghy haer trouw gheweldich sult ontvlieden,....
In een Cristale glas sal ick haer thoonen, siet,
Hij laet hem sien in eenen spieghel.
Siet daer oft loghen is, en raeckt den spieghel niet
Alpho. Acht t'is Felicia laet my het glas eens kussen
Sy ist die ick bemin
Taurin. Holla, t'mocht onder-tussen
U qualijck vaern sijn, dus siet wat datge doet
Die ongheregelt leeft al dickwils vallen moet.
Hier hebt ghy nu bescheet van t'gheen ghy wilde weten
Alpho. Gheluckigh ben ick die my soo stout heb vermeten
Te comen op des' plaets, ....siet daer dat is u winst
En danck u duysent-mael,
Taurin. Ick staen tot uwen dinst
En uwen dienaer blijft soo lanck ick noch sal leven.
Alpho. Adieu dan weerden man Godt wil u ruste gheven,.... binnen.
Taurin Hoe wispelturich draeyt fortuyn met desen vent
Wat hanght hem boven t'hooft noch droefheyt sonder ent
binnen.