BieAlphonsus1673p009

Lochtdrijver, schrick der zee, haghel stroyer die verweckt
Veel blijschap en verdriet als ghy maer eens en spreckt,
Die sijt onsienelijck en scheut vry naer u wenschen
Die quaet en goet cont doen onder de swacke menschen
Somma in 'cort gheseyt ick efter u aensien
Voor d'opper-hooft der kunst, en wijsten vande lien
Dus, t'gen, my lijden baert soeck ick van u te weten.
Taurin Ghy sijt als ick aen merck met Venus min beseten,
En die ghy soo bemint en woont niet veer van hier
Ten Westen noch ten Noort maer t'is in't Suyd' quartier,
Sy vlucht u soo het schijnt, toch heeft u in haer sinnen
En sult haer Nortsicheyt in corten tijdt verwinnen
Soo ghy naer mijnen raet wilt weten wat u schort
En waerom dat u hert tot my ghedreven wordt.
Alpho. Ick bid' u weerden vrindt, en sal u wel beloonen
Wilt my de oorsaeck eens van mijne quellingh toonen
Van mijn innich verdriet en druckich ongheval
Taurin Soo moet ghy dan al doen dat ick u seggen sal,
Voor d'eerst soo wil ick hier een doode handt doen haelen
Een doodtshooft met wat Cruyt, het ghen' ghy moet betaelen,
Dry Slanghen met een Pad, de gal van een Foret
Een ongheboren Calf, een keers van menschen vet,
De Lever van een raef, en neghen kraeyen ooghen
En noch veel ander goedt om over t'vier te drooghen
Waer med' ick weten can wat u gheschieden sal
Tot d'eynde aen u doodt gheluck oft ongheval
Maer eerst soo sout ghy my dry Croonen moeten gheven
Eer ick mijn Const aen u tot onder-hout van leven
Wil openbaren voor den oncost die ick doen
Alpho. Ick wel te vreden ben can ick maer liefde voen
Oft mach ick weten eens wie dat mijn vrou sal wesen
Ick waer van alle pijn en quelling hen ghenesen,