Door d'echte trouw den bandt wort samen vast gebonden,
Want noyt en heb ick soo naer wenschen iet gevonden
Dat my soo heeft behaeght. Celin: Hoe quamt gy hier te deysen?
Armelind. Seer vremt naer u vertreck uyt Moorenlandt, de reyse
Heeft my ghevallen suer, en t'arghste noch van al
Dat ick naer groote moyt quam tot dit ongheval,
Want als ick was gelandt, en wilde my vercloecken
Om Oost, Nord, Zuyd, en West u edelheyt te soecken
Int mans habijt ghecleedt, word ick ghevanghen, maer
De vromheyt van Florel mijn eer bewaerde, daer
Hy self nochtans ghenoegh te doen heeft, om och armen
Sijn ridderlijcken naem en eere te beschermen,
Die door verradery van schelmen is ghequetst.
En rakende mijn eer, die blijft ghelyck ghemetst
Besloten tussen calck en steen van trouwe deughden.
Celind. Geen blyer maer als dees Celindus ziel verheughden
Als u vergulde spraeck, als u glinsterende oogh,
Waer uyt ick anders niet dan hemels nectar soogh,
Regeerster van mijn hert. Arm. Celind mijnen beminden.
Florel. Men sou in dit gestreel seer qualyck eynde vinden,
Want t'brenght becooringh med. Aga. Sa gaen wy naer t'Casteel
Terwijl den avont valt. Celind. Mijn wederhelft en deel
Daer mijne rechte oogh van ionghs af aen op mickte,
En u voor mijne bruyt en gemalin toe schickte.
Florel. Het is ghenoch gekalt, den honger dwinght te gaen,
Al uwe soeterny gaet t'minste my niet aen.
Celind. Ick volgh den graef als slaef ter wijl ick ben ghevanghen.
Armelind. Ick oock nu my Florel gestelt heeft uyt t'verlanghen.
VERSCHOONINGH Binnen
De Mooren slaen het volck van Keyser Carel inde vlucht.
Florellus alleen.
Florellus. Jck hoor een vremt gherucht van trommel en trompet,
Jck hoor en niet en sien, wie ist die my belet
Te sijn int midden van des leghers vechteryen,
Geen blooheyt, maer den haet van Filibert, wat lyen
En is dit niet voor my, hoe ben ick dus ghestelt?
