65

Florel. Ick ben Florel die naer u droeve suchten hoor.
Agaren. Maseur siet uwen graef den oorspronck van verblijden.
Claricia Den oorspronck van mijn vreught en nu van bitter lijden.
Florel. Wel alderliefste lief, wat ist dat u soo quelt.
Claricia Ach vraeght ghy wie mijn siel en geest aldus onstelt,
U stoutheyt. Flo. Die is groot. Cla. Is nu u leet ghewroken?
Florel. Ia, want ick heb mijn oom selfs op den troon ghesproken.
Ghesproken onbekent, en hop' eer corten tijt
Te wreken al mijn leet aen die my soo benijt....
Siet daer sijn gouden vlies heb ick van't lijf genomen,
En sonder jemants weet daer mé uyt t'hof gecomen.
Delius. Maer vader dat is schoon, ey doet my dat eens aen.
Hy doet Delius het vlies aen.
Agaren. Ken can dees stoutheyt met mijn hersens niet verstaen,
Ken can daer geen verstant van middel uyt gherapen.
Florel. t'Is soo, wanneer dat hy was besigh met te slapen,
En dat ick was alleen, heb ick de cans ghewaeght
Als ghy voor ooghen siet dat Delius nu draeght.
Claricia Ick vrees dat dit noch sal bebloede halsen costen.
Florel. Ten geeft niet, want ten waer den Keyser my verlosten
Uyt desen swaeren ban die ick onnoosel ly,
Crijght hy het noit wedrom en hou het vlies voor my,
Alberius Hy noch geluckigh is van niet te sijn doorsteken.
Florel. Neen holla ken wou soo mijn ongelijck niet wreken.
Gaen wy naer Montelban, daer sal ick met vermaeck
U seggen hoe ick heb geleeft in dese saeck.
Claricia Verborght dan t'gouden vlies wilt ghy niet sijn verraden
Van den graef Olivier, want hy is al te quaden
En boosen instrument om sulcx te brenghen uyt.
Agaren. U vrouw bepeyst dit wel want t'is te grooten buyt
Die vanden Keyser comt. Flo. Laet gaen mijn tweede leven
Hy doet Delius het vlies af
Mijn alderliefsten soon ick sal u koecken geven
Die ick noch tot Parijs ghecocht heb aende poort
Als ick vertrocken ben. Alb. Sulcx en is noit gehoort.
Binnen.