64

Ach broeders ick beswijck, de wanhop my vercracht.
Agaren. t'Is de natuer die spreckt, die u ontnemt de macht.
Claricia t'Is Filibert die laes Florellus heeft in handen,
En spreeckt het vonnis uyt om levend' te verbranden.
Daer gaet hy. ach daer gaet hy als een slaef geboyt
Naer t'openbaer schavot, met drooge aerd' besproyt
Voor sijn onnoosel bloet dat uyt den hals sal springhen,
Als hem den wreeden beul met t'slagh-sweert om sal bringhen.
Ach siet het sweert van nu af aen is uyt de schee,
Hy bid vergiffenis. Alber. Ken can den druck en wee
Niet hooren van dees vrou.... Maseur stelt u te vreden.
Claricia Siet hy leyt op een rat, den beul gaet hem ontleden,
Men slaet sijn beenen en sijn armen op de poort
Die sijn gevierendeelt, hout op, neen t'is al moort,
Moort, moort. Aga. t'Is met respect dat ick u bid mijn suster.
Claricia Slaet Filibert dan doot. Alber. Ach stelt u wat geruster,
Ghy raest en bent als sot. Clari. Ach arm verslaghen siel.
Agaren. Bevestight uwen wil met ons. Delius Dat ick dien fiel
Eens aen het water sagh. Alb. Wie? Delius Filibert den grooten
Verrader, die ick sou daer in van achter stooten
Dat hy verdrincken sou den boosen roffiaen,
Ghelijck ick lestmael aan ons leeuken heb gedaen,
Die ick had aen den hals n'en grooten steen ghebonden
En wirp hem inde ruy. Clar, O alderwreetste honden
Die mijnen lieven man gaen schelden voor verraer,
En maecken door den nijt van hem een martelaer,
Die sich door vreese moest verberghen in de hoecken,
Gaet noch in't midden van de vlam sijn doot-vier soecken,
Dat hem verbranden sal, ô ongheluckigh lot!
Alberius Maseur ick bid noch eens betrout u saeck op Godt.
Claricia O Godt verleent mijn graf want ick verlies het leven.
Agaren. Haer aansicht wordt heel bleec... de crachten haer begeven,
Ghedoogh maseur, ghedoogh dat men u onderstut.
Delius. Wel hoe gaet mijn mama dan soo recht naer den put,
Sal ick den enghel sijn en rijspap moghen eten?
Alberius Ach ick en sal den druck mijn leven niet vergheten.
Agaren. Siet wie dat hier verschijnt het is noch eenen moor.