47

Hebt ghy in uwe mael wat lackers, t'wort nu tijdt
Om wat te schaffen vrindt. Coridon Ick sit om den imbijdt
Ghereet te maecken, want den beir begint te dansen,
Sa brenght het u by ons en laet ons samen schransen.
Florellus Claricia en Delius uyt.
Wat volck ick heenwaerts sien, t schijnt t'is een grooten heer
Met een seer eel Mevrou. Rosana T'is Graef Florellus weer
Die comt naer sijnen reuck by ons op schimmel ryen,
Coridon. Houd' uwe mael ghestopt, en laet hun eens betyen
Oft sy noch eens soo stout ons sullen eyschen wat.
Rosana. Ken t'wijfel daer niet aen, dat volckxken uyt de stadt
Is al te hongherich om soo voor by te treden.
Florel. Mijn vrinden al te saem, vergheeft ons stoutigheden
Dat wy hier comen elck om een cleyn stucxken broot
Te vraghen, want ons dwinght den aldergrootsten noot
Die iemand' op dees aert can segghen oft bedencken,
Ick bid u wilt ons dan u goede miltheydt schenken.
Ist moghelijck dat ick soo, noch op mijn eyghen landt
Gaen bedelen wat broot, en is dat gheene schandt.
Ick sal u thien-mael meer als sijne weerde gheven,
Want t'broodt is daer den mensch moet alder-meest by leven.
O hemel staet ons by in allen dees allendt.
Delius. Heer vade ick beswijck Claricia En is dat geen torment
Soo teeren jongelingh naer broot sien op te springhen
Rosana. Het medelijden d'winght my voor den dach te bringhen
Al t'gene dat ick heb, nemt daer is broot en kaes,
En daer is noch wat vlees, Flo: Gy syt een brouwen baes
Die ick sal metter tijdt in mijn ghedaechten houwen.
Delius. Vrou moeder ach hoe goet, hoe smaeckt dat sonder knouwen
Goy Herders syt ghedanckt. Coridon O Heer wat sien ick daer
Van veer soo comen aen, het is een groote schaer
Soldaten soo my dunckt, ghewapent om te vechten,
Wat sal dat legher volck hier willen uyt gaen rechten,
Daer is een grooten hoop. Flo. K'word hier verraen. Cla. Och Godt
Florellus. Laet sien, t'is Filibert die comt recht naer mijn slodt,
Claricia. Wat raet; ey my. Flo. Swijgh stil.. wel hoe sal ick my bergen
Voor een verrader, neen, de wraeck begint te terghen