Ick volghunaer terstont, dus gaet ghy haestich voor,
Mopsus . Wat sal Felicia nu doen, die arme sloor
Alpho. Toomt uwen beck.... laet van Felicia nu swijghen
Mopsus Jae comt sy door den druck noch gheen misval te crijghen,
Alpho. Wel hoe gaet sy dan groot? spreckt; ghy en plompen kloen
Mopsus Mijn Heer, k en wetet niet, t'is quaet om goet te doen
Het comter dickwils van, wanneer men in het doncker
Veel vryicheyt ghebruyckt, toch ick peys dat Me-joncker
Heeft suyverheyt belooft, Alphon. hout uwen ratel beck,
Hoe ismen staegh ghequelt met eenen sot oft geck.
binnen.
Vijfde Uyt-comen.
Den Keyser Adolphus, Romanus Ambassadeur, Iulius,
Atrastes, en Henricus, Edelmans, met den Secretaris.
Adolp. T'Is wonder dat een man sijn selven laet verwinnen
Als maer een cleyne lust spelt in sijn swacke sinnen,
Wat cander stercker sijn als liefde, die den mensch
Bedwinght, en toomt den wil naer haeren eyghen wensch.
De liefde set niet aen, hoe sterck, gheleert en maghtigh
Haer lusten sijn soo groot, soo vinnigh en soo crachtigh
Dat niemand segghen can dat liefd gheen macht en heeft
Dat liefde aenden mensch gheen quellinghen en gheeft.
Dit voelden ick ghenoegh door Venus minne schichten
Soo haest ick maer den schijn van Venus mocht besichten,
Iae, Venus segghen magh soo haest haer wesens beldt
Heeft met vermaeck en lust in mijn ghedacht ghespelt,
Toen costick dagh noch naght mijn fiel met ruste voeden
Maeraesden mijn teer hert met een beanxt vermoeden,
Om een schoon vrou alleen die my nu heeft ghestelt
Door liefde inden bandt van haer seer sterck ghewelt
