Borssesnyers1673p081

haer wooningh seker houwen och Godt hoe sal den boer daer naer den kop nock krouwen .... sy sijn al inde muyck, nu staen ick inde deur, eer t'wijf mij eens verrast, k'en wachten noyt van daegh een sulcken goedt faveur daer is mijnen monsieur als eenen muyl ghelaeden met allen dat ghetuygh, dat my niet en sal schaeden.
Ariaen.
Mijn heer hier is het al, ghelijck ghy had belast. Siet oft u desen rock en tabbaert oock wel past. Soo hoop ick uyt den last van quellingh eens te raecken .....
Neel.
Stelt ghy u maer in rust ick sal't met u wel maecken. Ghelooft vry dat u saecken staen als een blom op't velt.
Ariaen.
Ken twijfel daer niet aen, oft t'is al wel bestelt, ghelooft vry dat u gelt daer naer ghereet sal wesen, waer ick eens vande quael der vrouwen pest ghenesen, ick gaen ter wijlen edan een stoopken legghen aen, hier by in't achter-broeck tot dat ick sien voldaen mijn lanck ghewenst versoeck, daer ick u sal verwachten.
Binnen.
Neel.
Ghy sult mijn dienst-baerheyt hier naer wel moghen achten, ick gaen haer soecken dan daer ickse vinden mach den armen boer Ariaen noyt slimmer boeff en sach oft noyt meer sien en sal als my die met mijn lieghen door mijne slim practijck de werelt can bedrieghen
binnen.
Jacomijn uit.
O dien Judas baert die van een valt van de pocken, ick sal sijn pap soo dick brocken dat hy noch met stocken sal worden uyt ghelicht, och hy is lanck ghebicht en oock verwesen wou hem iemandt maer de corst af-lesen ick waer ghelijck verresen van een seer bitter doodt, wie isser argher aen als ick die gaen soo groot dat ick qualijck can aenschouwen mijne voeten, quam ick den officiael maer eens te ontmoeten ick sou hem begroeten en claghen mijn verdriet, o dien stink-vis dien deugheniet die al den dach loopt uyt soppen, heeft hy veel eyers hy maeckt veel doppen.
Neel uit.
Sou dat het wijf wel sijn van mijnen armen Boer, ick wedde dat ick haer den klepel-beck haest snoer, al ist een valse hoer daer is niet aengheleghen.
Jacomijn.
T'is wonder dat ick gheen misval en heb ghecreghen als my den schelmschen guyt brocht in veel smert en pijn .....