35

Florellus. K'waer liever synen beul om op een rat te legghen.
Agarenus. Ghy syt den selven schelm, daer is niet aen te segghen
Die Keysers standaert voert. Flor. T is vals, dus houd u stil
Agaren. En sloeght ghy niet den Moord? Flo. Dat was soo mijnen wil
Te slaeghen, en daer by den Coningh self te vanghen.
Coninck. Daer Armelinda met Celindus naer verlanghen.
Agar. Hier sijn sy alle beyd, en staen in mijn bevel.
Florellus. En hunnen Vader inde macht van Graef Florel.
Agar. Wat spokery is dit, hoe derft ghy u vermeten
Te comen by sijn slot. Flo. Om u eens doen te weten
De wondere fortuyn die hem weervaren is.
Agar. Ach is Florel dan doodt! Flo. Maeckt geen beswarenis,
Hy leeft. Agar. Neen, swijght gy veynst, eylaes ick hoor hem stenen
My dunckt ick sien den geest. Flo. Waer loopt u voordacht henen.
Agar. Florant sa; weirt u lijf, ick haeck naer uwe doot
Florel doet sijn Hellemet af en maeckt sich kenbaer.
Florel. Swijght Broeder, siet Florel en heeft van t'lijf geen noot,
Schept moet, want de fortuyn die heeft my comen nooden
Met u by haer te gast, en schept in al de dooden
Des vyants selver vreught, den Hemel laght ons aen,
Want t'dijdt tot voordeel al het gene wy bestaen.
Agar. Hoe dus den standaert, en Florantus legher-cleeren
Jn u ghesach gheraeckt. Florel. Florant cost my niet deeren
Als ick den blooaert op den vlucht heb uyt gheschut,
En half naeckt wegh gheiaeght, waer med' ick heb ghestut
De Moorse furien, die teghen de soldaten
Van t'Fransche legher soo hels waren uyt ghelaten,
Dat sonder mijne hulp t'heel heyr was omghebracht,
Waer van Florantus nu de eer, en loon recht wacht,
Midts niemandt anders meynt, oft desen heeft sijn leven
Als Capiteyn ghewaeght, en ick heb t'stuck bedreven
In sijn verraders cleedt als ghy voor ooghen siet.
Agaren. Nu hop' ick dat wy haest verlost sijn uyt t'verdriet,
Want d'overwinnigh dempt ons droeve onghelucken,
En glori waghens maeckt voor al de vremde stucken
Die ghy hebt aen-gherant tot ondanck vande nijdt
Die cnaeght haer eijghen hert, en eet het op van spijt
Nu hop' ick haest te sien het eynd' vande tyrannen