30

Coninck. En slaet my so niet door. Flo. Wie sijt gy. Con. t'hooft der mooren,
Ick heysch quaertier heer Graef. Flo. Ick sal u soo door-booren
Oft gheeft my u rapier, Con. dat is te stouten vraegh.
Florel. Soo niet dat gaeter door en t'cost u besten craegh,
Dus weyghert my niet meer. Con. Daer ist tot mijne schanden.
Florel. Dat is het oorloghs lot. Con. Ten waer ghy my vermanden
Ken gaf my soo niet op, maer nu ick ben int net,
En u ghevanghen man, den noodt en stelt gheen wet.
Wat swaren over-last van droefheyt pijnt van binnen
Dit edel-moedigh hert, hoe worden mijne sinnen
Gheraybraeckt van Fortuyn, die anders niet en doet
Als staegh te snacken naer de leste druppel bloet
Die in mijn aders is, en stapelt sucht op suchten.
Allendigh lot t'gen my belet hier uyt te vluchten,
Om dat den stercken strick van dees ghevanghenis
Door over-winnigh al te vast ghebonden is:
Waer swiert mijn los ghedaacht, geen kermen can my baten,
Nu ick van vrou en kindt en 't Crijghs-volck ben verlaten,
Soo saey ick vruchteloos mijn tranen op dees aert,
Die geen medooghen oft bermhertigheyt en baert
Aen my die heyden ben, en niet en gheeft dan plaghen
Midts hy ghewoon is niet als Christenen te draghen,
Waer blijft ghy vroom Celind den eersten Prins van t'rijck
Marocco, om te sien wat smertigh onghelijck
U Coninck, heer en vorst moet teghen danck ontfanghen.
Celindus ach Celind! Florel. Celind is oock ghevanghen
Beneffens de Princers u dochter Armelind,
En sijn hier by op t'slot. Koninck de dood my over-windt
Want ick beswijcker af soo t'waer is, ach wat maren
En comen mijne ziel niet persen en beswaren,
Mijn Armelinda met den Prins oock vast ghestelt,
Daer wensch ick by te sijn. Florel. U selven niet en quelt,
Ghy handelt met geen man, die u als een verrader
Onthaelen sal, neen, peyst dat ick ghelijck een vader
Sal aen u Kinders doen en gheven goedt quartier
Naer Princelijcken staet en eer, gae med, siet hier
Ist slot van Montelban, mijn heerlijckheyt en erve,
Waer op ick als bandiet by naer van hongher sterve,