28

Daer ick voor desen plach den eersten in het velt
Tot vyands spijt te sijn, ick sien daer een slach-oorden
Die haer van veer ontdeckt, het gaeter aen een moorden.
Florellus blijft ghy staen, waer is u hert, ick sien
Den Fransman voor den Moor als stoff voor winder vlien:
Daer comt een Edelman met sijnen gulden standaert
Ghevlucht, wel wat is dit, ick meynden ghy een man waert
Florelle vol van vrees; wel hoe, neen t'hert is goet,
Wat ist dan dat u houdt, de reden ... bloo ghemoet
Val aen en thoont u kracht, neen holla, t'mocht my leet doen,
Jck kruyp hier onder t'hegh, en sal hem goedt bescheet doen.
Binnen. Florante met den standaert vluchtende uyt.
Florante. O noot-lot, ach wat spyt dat wy gheslaghen sijn,
Jck hoor gherucht, waer heen, sy sijn daer, t'hert vol pijn
En vrees sluyt seffens toe, waer blijf ick, k'ben verloren,
Den wegh is onbekent, ach waer ick noit gheboren
Als hier tot mijne schant, te loopen op de vlucht,
Ey my, ick wensch de doodt, ick hoor al weer gherucht,
Waer desen standaert t'huys, daer ben ick voor beladen,
Den standaert vrees ick, sal hier mijnen naem verraden,
Jck bergh hem in dit loof, en sluyp de bosschen in,
Want even wel en heb ick geenen vechtens sin.
Hy borght sijnen standaert in eenen cant. Florel ontdeckt.
Florellus. Staet vast verrader staet, ghy sult my niet ontloopen,
Staet Christen ziele staet, ick sal u huyt af stroopen
Soo ghy een voet verset. Florant Ken ben gheen Fransman heer
Florel. Soo sijt ghy een verraer, die heeft verloren d'eer
En beter droegh een spriet, om schapen te gaen houden
Als eene scherpe Klinck, syt ghy van Edel bloede
Vervloeckten Esel-cop, ghy moght een bastaert syn
Gheteelt in een bordeel, oft van een morsich swyn
Gheworpen in het cot, daer t'stinck om af te spouwen
Ghelijck u naem en faem, men mach u wel betrouwen
Des Coninckx standaert, om te steken inden cant
Als t'op een vechten gaet, ick achtet meerder schant
Als eer, om soo ene schelm te moorden oft te vanghen
Die gheene Kempe koor verdient om aen te hanghen,