25

Bernaert. Hoe soo dan Filibert, hy sal u eens beschencken
Wanneer ghy hem besoeckt: Baud. Met edick en regal:
Bernaert. Ten is niet wonder dat den nijdt, vreest voor den val.
Samen binnen.
AGARENUS en den Prins CELINDUS samen vechtende uyt.
Agaren. EEr ick m'op gheven sal, wil ick u vel af stroopen
En hanghen t'hier te pronck, ghy sult my niet ontloopen
Al vlooght ghy recht om hoogh, ick vat u met den voet,
Om mijnen poignaert eens te verven in u bloet.
Celindus. Die schepters staplen can van veel verwonnen rijcken,
En slorpen Coninkx bloet, sou die hier moeten wijcken
Voor een verworpen siel? neen, daer, dat treft u wat,
Jck reck de ziel uyt t'lijf, holla ick ben te mat,
Den adem my begheeft. Agar: Wilt ghy geen leven vraghen?
Celindus. Neen seker, maer ick heb thien levens om te waghen.
Agar. Als Eelman gheef ick t'u. Cleind. Wie vraget ghy oft ick?
Agar. Jck schenckt hem die het vraeght. Cel. Op eenen oogenblick
Heb ick met u ghedaen. Al vechtende binnen.
Florellus in torckse Kleederen met Armelinda uyt.
Florellus. sal dit noch langher duren:
Mevrou staeckt u gheween, wij sijn geen seven uren
Meer van u vaders vloot. Armeli. Ach is het noch soo lanck!
Florellus. Ghy kent mijn Jonstigh hert. Arme. Daer van ick u bedanck.
De liefd' die t'hert beherst, valt my al veel te druckigh,
Hoe dwael ick over al, ben ick niet ongheluckigh
Tot quetsingh van mijn eer, dat ick in dit ghevaer
Des oorloghs wordt gheperst, het valt my laes soo swaer,
Dat ick gaen heen en weer, ghelijck een schaep verdolen,
En vlucht my selven, ach! al oft ick waer ghestolen:
Ghestolen, t'is alsoo, want die ghevanghen is
Js een ghestolen ziel, vol van becommernis.
Florellus. Mijn gheest wordt soo beweeght, dat, wilt ghy my gebieden
Mijn leven is voor u, u can geen leet geschieden
Soo ghy op my betrouwt. Arm. Ick danck u Graef Florel.
Agarenus met Celindus al vechtende uyt.
Agaren. Hertneckighen tiran ghevoelt ghy dat niet wel?
Sy vallen op malcanderen.