In dese duysternis, ken wil my thans niet setten
Tegen des keysers weth, schoon dat hy wilt besmetten
Sijn handen met mijn bloet.... ach had ick maer papier
Met eene pen, k'sou met mijn eygen bloet alhier
Beschrijven wie ick ben, terwijl ick niet eens spreken
En magh in vollen raet, soo word' ick uyt-gestreken,
Ick sou beschrijven hoe onnoosel dat nu wort
Mijn jeughdigh leven door een valse tong vercort. t'Gevangenis wort geopent.
Hier sal mijn vonnis sijn, ic hoor de filen comen
Die snacken naer mijn doot, daer ick altijt soo vromen
Velt-ridder ben gheweest, en voor des Keysers eer
Gestreden totter doot. Dudon. Hier ist eerweerdigh heer
Dat den verrader sit. Florel. Men noemt my weer verrader,
O dief, รด schelm..... Wats dit voor eenen ouden vader....
Ia t'sal een bichtvaer sijn, Godt zy gebenedijt,
Dat jemant noch eens denct op mijne saligheyt. Dudon binnen.
Agaren. Florelle liefsten vrint, Florelle mijnen broeder....
Florelle, ach ick sterf, nochtans uwen behoeder
Van uwe welvaert comt by u in doots gevaer,
Schep moet seer edel graef. Flo. k' sou seggen dat het waer
De stemme van mijn broer, soo hy met dese cleeren
By my niet en verscheen om saligheyt te leeren.
Duyvel. t'Is Agarenus selfs die u verlossen comt.
Florel. Hoe Agareen by my, ick staen gelijck verstomt.
Ach broeder mijnen vrint, broeder. Aga. k'en can niet spreken
Van droefheyt die my perst, nochtans soeck ick te wreken
De boosheyt vanden nijt die u onnoosel tracht
Te leyden naer t'schavot, dus com ick onverwacht
Om u hier by te staen. Flo. Ach broeder weer ghepresen
Om u getrouwigheyt, maer hoe sou't connen wesen,
Daer ick aen voeten en aen handen sit geboyt,
En met soo stercke wacht bewaert. Aga. U niet en moyt,
Ick weet daer toe al raet, betrout u op mijn cunsten.
Florel. Hoe sal ick ach hoe sal ick oit u troubaer gunsten
Verdienen, die ghy my comt schencken inden noot.
Duyvel. Ia sonder sijne hulp soo sijt ghy morgen doot.
Agaren, Ras schud' u cleeren uyt. Flo. k'en can door dese banden
