BieAlphonsus1673p043

En gaet soo sijnen woon verlaten en verand'ren
Soo als men siet dat sy versaemen by malcand'ren.
Dus ben ick oock ghestelt in dit mijn ongheval
Niet wetende wt doen oft wat ick laeten sal,
Fortuyn heeft my op Zee veracht en gans verstooten,
Maer nu comt my t' gheluck met nieuwe vreught vergrooten,
Schoon dat ick ben gheweest in droefheydt pijn en smert,
In dese edel stadt was evenwel mijn hert,
Wat dunckt u van dit Landt?
Mopsus: Cost ick maer Enghels spreken
Daerom heb ick het hert vol swaer ghepeysen steken,
Alphonsus. Als ghy in 't Hoff sult sijn daer spreecktmen al van als
Mopsus Jae ick en can maer Spaens en een cleyn betjen Wals,
Mijn Heer wat mach daer sijn, ick hoor Trompetten blasen
Ick hoor het Enghels volck hier over al seer rasen.
Soumen Justiti doen, oft ist hier Kerremis,
Men danst, men springht, men fluyt, ken weet nie watter is
Daer moet jet sijn te doen:
Eenen Arbeyder met een pack op den hals wt.
Arbeyder: Den bras is swaer om draeghen
Alphonsus. Mopsus daer comt een man ghy moghet hem eens vraeghen,
Arbeyder. Och waer ick aen de kaey, ick sweet als eenen das.
En hijgh ghelijck een Swijn, daer leyt den heelen bras
Ick mach wat rusten hier, want ick ben half beschoncken
En mocht eens vallen, als de ander, die heel droncken
En sat sijn van den wijn, k'heb noot meer vreught ghehoort
Als desen dach, het is al door den neus gheboort
Wat lepel lacken can
Mopsus. Waer gaet ghy henen stouwen
Arbeyder Naer t' Schip, en weet ghy niet dat ons Princers gaet trouwen
T' heel Hoff dat is vol vreught sy gaet de Zee strackx in
Mopsus aen Alponsus.
Hier hebt ghy wel ghetreft dat ghy had inden sin:
Alponsus. Ey vrindt blijft weynigh staen ick heb u eens te spreken